राजविराज । सप्तरीको अग्निसाइर कृष्ण सवरण गाउँपालिका–४ टेङ्गरी गाउँका बासिन्दाहरूले लामो समयदेखि झेल्दै आएको कम भोल्टेजको समस्याबाट मुक्त भएकाछन ।
स्थानीयवासीले वर्षौंदेखि भोल्टेज कम भएर विद्युत आपूर्तिमा समस्या भोग्दै आएका थिए। यस समस्यालाई मध्यनजर गर्दै वडा अध्यक्ष तेजनारायण यादवको पहलमा नेपाल विद्युत प्राधिकरण कंचनपुर वितरण केन्द्रका डी. अरुण कुमार साहको सहयोगमा टेङ्गरीमा रहेको २५ के.भी क्षमताको ट्रान्सफर्मर प्रतिस्थापन गरी १०० के.भी क्षमताको नयाँ ट्रान्सफर्मर जडान गरिएको हो।
नयाँ ट्रान्सफर्मर जडानसँगै गाउँमा विद्युत आपूर्तिमा उल्लेख्य सुधार आएको छ भने कम भोल्टेजको समस्या पनि समाधान भएको छ।
यस परिवर्तनपछि गाउँका बासिन्दा अत्यन्तै खुसी भएका छन्। स्थानीय बासिन्दाहरूले जनहितमा तत्परताका साथ काम गरेकोमा वडा अध्यक्ष यादव तथा नेपाल विद्युत प्राधिकरण कंचनपुर वितरण केन्द्रका सम्पूर्ण कर्मचारीहरूप्रति आभार व्यक्त गरेका छन्।
