जनकपुर । जनमत पार्टीले स्वराज आन्दोलनका प्रथम वीर शहीद राम मनोहर यादवको आठौं श्रद्धाञ्जली दिवस विभिन्न कार्यक्रमसहित गर्ने भएको छ ।
पार्टीका केन्द्रीय प्रवक्ता डा.शरद सिंह यादवले शुक्रबार एक सूचनामार्फत भदौ १५ गते आइतबार साँझ ७ बजेदेखि देशभर श्रद्धाञ्जली कार्यक्रम आयोजना गर्न सबै जिल्ला र वडा कमिटीलाई निर्देशन दिएका छन् ।
श्रद्धाञ्जली कार्यक्रममा शहिद राम मनोहर यादवको फोटो राखी मैनबत्ती तथा दिप प्रज्वलन गरिने जनाइएको छ । प्रत्येक जिल्लाका सबै वडामा, जिल्ला सदरमुकाममा तथा पार्टी कार्यालयहरुमा एकैसाथ श्रद्धाञ्जली कार्यक्रम हुने जनमत पार्टीले जानकारी दिएको छ ।
स्वराज आन्दोलनका क्रममा नेपाल सरकारका तत्कालिन उपप्रधानमन्त्री उपेन्द्र यादवलाई कालो झण्डा देखाउने क्रममा पक्राउ गरी राम मनोहर यादवको हत्या भएको थियो । स्व.यादव जनमत पार्टीको एक मात्र शहीद हुन् ।
