सुनसरी । सुनसरीको देवानगंज गाउँपालिका–३ खत्वै टोलस्थित नहर नजिकबाट प्रहरीले ठूलो परिमाणमा लागुऔषध गाँजा बरामद गरेको छ । शुक्रबार राति करिब ९ बजे लागू औषध ओसारपसार भइरहेको भन्ने विशेष सूचनाका आधारमा इलाका प्रहरी कार्यालय देवानगंजबाट खटिएको टोलीले चेकजाँचका क्रममा ६० किलो गाँजा फेला पारेको हो ।
प्रहरीका अनुसार देवानगंजबाट कप्तानगंजतर्फ गइरहेको एक मोटरसाइकलमा गाँजा ओसारिएको थियो । तर, चेकजाँचको क्रममा मोटरसाइकल चालक मोटरसाइकलसहित फरार भएका थिए । घटनास्थलमा फालिएको दुईवटा सेतो बोरा खोलेर हेर्दा एउटा बोरामा रातो प्लास्टिकले बेरिएको तीन पोका गाँजा र अर्को बोरामा खुल्ला रुपमा सेतो प्लास्टिकमा राखिएको गाँजा जस्तो देखिने पदार्थ फेला परेको प्रहरीले जनाएको छ ।
बरामद गरिएको गाँजाको तौल ६० केजी रहेको छ । गाँजासहितका बोराहरू आवश्यक अनुसन्धानका लागि जिल्ला प्रहरी कार्यालय सुनसरी ल्याइएको छ भने फरार मोटरसाइकल र तस्करको पहिचान तथा खोजी कार्य तीव्र पारिएको जिल्ला प्रहरी कार्यालय सुनसरीका प्रवक्ता प्रहरी नायब उपरीक्षक (डीएसपी) योगराज खतिवडाले जानकारी दिनुभयो ।
यस घटनाले सीमा क्षेत्र हुँदै लागुऔषध ओसारपसार गर्ने गिरोह अझै सक्रिय रहेको संकेत मिलेको बताइएको छ । प्रहरीले यस विषयमा गम्भीर अनुसन्धान थालेको जनाएको छ ।
६० किलो गाँजा बरामद तस्कर फरार सुनसरी
