राजविराज, १० साउन । सप्तरीको रुपनी गाउँपालिका–२ स्थित पौवाँ टोलमा विद्युतीय करेन्ट लागेर एक दम्पत्तीको ज्यान गएको छ । ई–रिक्सा चार्ज गर्ने क्रममा करेन्ट लाग्दा ४२ वर्षीय बालेश्वर खंग (कैला) र उनकी ३८ वर्षीया श्रीमती रामकुमारी खंगको ज्यान गएको हो ।
शुक्रबार राति आफ्नो प्र.१–०२–००४–ह–६५२२ नम्बरको ई–रिक्सा घरअगाडि रहेको कठघराबाट निकालिएको विद्युतीय तारमार्फत चार्ज गर्ने क्रममा बालेश्वरलाई करेन्ट लागेको थियो ।
बालेश्वर लामो दिनको सवारीपछिको थकान मेट्न घर फर्किएका थिए । जस्तैगरी चार्ज गर्न गएका उनी लामो समयसम्म नफर्किएपछि खोज्न गएकी रामकुमारी पनि करेन्टको चपेटामा परेकी थिइन् ।
राति नै दम्पत्तीलाई करेन्ट लागे पनि घटनाबारे बिहान करिब ४ बजे मात्र थाहा भएको थियो । जेठो छोरा सुरजले बाबुलाई रिक्सामुनि ढलेको देखेपछि छरछिमेकलाई खबर गरेका थिए ।
छिमेकी प्रमिला खंगका अनुसार, मृतकलाई करेन्टबाट छुटाउन खोज्दा आफू पनि घाइते भएकी थिइन् । उनका अनुसार सुरजले लाइन काटेपछि मात्र छिमेकीको सहयोगमा बालेश्वर र रामकुमारीको शव निकालिएको थियो ।
घटनास्थलमै पुग्नु भएका समाजिक अभियानता राजु जैसवालले मृतक परिवारको अवस्था अत्यन्तै पीडादायक रहेको जानकारी दिनुभयो । “बालेश्वर केही महिनाअघि मात्र ई–रिक्सा किनेका थिए, घरको सम्पूर्ण जिम्मेवारी उनैको काँधमा थियो। अभियनता जैसवालले भन्नुभयो दुवै अभिभावक गुमेपछि अब ती छोराछोरीको अवस्थाबारे सोच्नै कठिन छ ।”
मृतकका १९ वर्षीय जेठो छोरा सुरजको विवाह केही महिना अगाडि मात्र भएको हो भने ७ वर्षीय कान्छो छोरा जन्मजात वाक अक्षम छन् । कमजोर आर्थिक अवस्था, अपाङ्ग सन्तान र एकैचोटि बाबुआमा गुमाउँदाको पीडाले परिवारलाई थप संकटमा पारेको छ ।
घटनापछि गाउँमा शोकको वातावरण छाएको छ । मृतक दम्पत्तीको शवलाई पोष्टमार्टमका लागि गजेन्द्रनारायण सिंह अस्पताल, राजविराज लगिएको जिल्ला प्रहरी कार्यालय सप्तरीले जनाएको छ ।
